掠水名醫

掠水名醫

同香港好多小朋友一樣，阿安個仔都患咗濕疹，而且醫極都唔斷尾。阿安為咗個寶貝仔，時不時要請假去睇名醫，佢老闆見到咁就俾說話阿安聽，叫佢不如全職睇住個仔，搞到阿安鬼咁大壓力，怕隨時連份工都無埋，後尾連自己都有埋濕疹，認真濕滯。自己有濕疹唔醫，阿仔都要醫，但睇一次名醫，閒閒地成二千蚊，冇咗份工點俾醫藥費呀？阿安唯有帶完阿仔睇名醫，拿拿臨返到屋企繼續做公司嘢。

叫得名醫都有3個共通點：好貴、好難約，同好耐都醫唔好。最近阿安帶阿仔轉睇另一個皮膚科名醫，佢哋去到間裝修好靚嘅診所，等咗成個鐘先見到醫生。一坐低，個醫生用接受電視訪問嘅温柔語氣問：「你咩唔舒服呀？」期間佢對眼全程無離開過電腦個mon。阿安話：「我個仔啲濕疹好犀利……」都未講完名醫就打斷：「我聽日下晝可以幫佢做脫斑，你叫佢早啲嚟搽定Gel。」阿安嚇到呆咗，以為名醫忙到黐咗線，當名醫轉身望住個護士，阿安先知佢原來係吩咐緊護士幫前一個病人約期。

跟住，名醫又望住個電腦話：「天氣都對濕疹有影響，佢呢排會辛苦啲。」雖然名醫冇望住阿安，但阿安諗名醫呢句應該係同佢講，而護士係呢一刻亦插嘴：「你聽日3點仲有個patient！」名醫話：「應該好快睇完。」名醫繼續話：「嗱，我開啲藥膏俾佢搽兩個星期，你哋出去同護士約期啦。」阿安完全唔知名醫係同護士講、同自己講定同阿仔講，好亂呀！

名醫繼續好温柔咁話：「你唔好俾囝囝隻手仔，愈愈痕㗎。」吓？阿仔係隻腳有濕疹，點解名醫叫佢唔好隻手？唔通痛有原痛點，痕一定有原痕點，腳痕其實係手痕，咁博大精深嘅醫術，加埋明星咁嘅氣派，仲送埋幾支潤膚露俾你，唔使你去藥房買，只係收二千蚊咋，仲唔夠抵？睇完名醫，阿安又要拿拿臨趕返屋企繼續做公司嘢，唔係又點負擔得起睇名醫呀？

梗有一個喺左近: 陳嫣

作者簡介:

市場部大姐，見慣風雨，更見盡職場瘋語。深明同事俾面就叫嫣姐，背後則叫她Mean姐，因為無嘢逃過得她的mean眼。

資料來源：am730 (15-05-2019)

選文來自：香港E大夫／醫大夫

E大夫醫生網是香港人最喜愛的醫療網站

E-Daifu.com

The above information is not medical advice, for reference only / from :

WhatsApp Number:5548-8918